15.01.2025
Рэспубліканская дабрачынная акцыя для пажылых
Рэспубліканская навагодняя дабрачынная акцыя "Ад усёй душы" пройдзе з 26 снежня 2024 года па 15 студзеня 2025 года ва ўсіх рэгіёнах краіны.
Акцыя "Ад усёй душы" праходзіць па ініцыятыве Прэзідэнта. Яе галоўная задача - акружыць клопатам і ўвагай нашых пажылых грамадзян напярэдадні такіх светлых свят, як Новы год і Каляды.
Гэтая акцыя з'яўляецца працягам акцыі "Нашы дзеці", і галоўны яе пасыл, сфармуляваны Кіраўніком дзяржавы, у тым, што спачатку мы ідзём да дзяцей, а потым дзеці ідуць да нашых старых. Стаўленне да дзяцей і пажылых людзей з'яўляецца сацыяльным індыкатарам здароўя грамадства і ягонага маральнага дабрабыту. Таму асноўны канцэпт акцыі заключаецца ў тым, каб праявіць гэты клопат з боку нашага маладога пакалення і максімальна ўцягнуць іх у пытанні аказання дапамогі старэйшаму пакаленню. Чырвонай ніткай скрозь усю акцыю праходзіць значнасць развіцця сувязі паміж пакаленнямі.
Акцыя ў Беларусі праходзіць ужо трэці раз. У мінулым годзе ахоп грамадзян склаў больш як 330 тыс., а ўдзел у акцыі прынялі больш як 80 тыс. маладых людзей, прыцягнутых Беларускім рэспубліканскім саюзам моладзі, піянерскай арганізацыяй і валанцёрскімі аб'яднаннямі.
Усяго ў Беларусі пражываюць больш за 1,5 млн людзей ва ўзросце старэйшыя за 65 гадоў. У рамках акцыі асаблівы акцэнт будзе зроблены на адзінокіх грамадзянах, якіх у нас у краіне больш за 120 тыс. Людзей, якія пражываюць у сацыяльных установах, - каля 20 тыс. Асаблівая ўвага доўгажыхарам - у нас у краіне больш за 40 тыс. людзей, якім ужо споўнілася 90 гадоў, і 613 чалавек старэйшых за 100 гадоў, а таксама ветэранам Вялікай Айчыннай вайны - 961 чалавек, былым вязням фашызму і тым грамадзянам, якія ў перыяд Вялікай Айчыннай вайны знаходзіліся ў непаўналетнім узросце. Такіх у нас амаль 500 тыс.
