Дзень пажылых (2023)

1 кастрычніка Беларусь адзначыла Дзень пажылых людзей. Мерапрыемствы, прымеркаваныя да гэтай даты, прайшлі ў краіне.

27 верасня ў Нацыянальным прэс-цэнтры адбылася прэс-канферэнцыя «Сацыяльная ўключанасць пажылых людзей - шлях да актыўнага даўгалецця»

28 верасня па ўсёй краіне прайшоў ІІ Рэспубліканскі марафон скандынаўскай хады. Ён сабраў на сцежцы здароўя больш як 5 тыс. грамадзян "сярэбранага" ўзросту - аматараў актыўнага адпачынку. Масавы старт марафону дадзены ў Баранавіцкім раёне. Нагадаем, летась у мерапрыемстве па ўсёй краіне прынялі ўдзел каля 2 тыс. чалавек, з адкрыццём марафона ў Салігорску.

29 верасня на тэрыторыі гісторыка-культурнага музея-запаведніка "Нясвіж" прайшоў абласны баль для грамадзян пажылога ўзросту. Удзел у ім узялі каля 70 чалавек.

30 верасня ў Мінску больш за 150 наведвальнікаў сталічных тэрытарыяльных цэнтраў сацыяльнага абслугоўвання насельніцтва сабраліся на танцавальным фэсце «На крылах танца».

30 верасня каля 100 пажылых аматараў спорту прынялі ўдзел у адкрытых рэспубліканскіх спартыўна-масавых спаборніцтвах «Актыўнае даўгалецце - 2023».

Да Дня пажылых таксама прайшлі круглыя сталы з удзелам дзяржорганаў, медыя і грамадскасці, міжпакаленчыя дыялогавыя пляцоўкі, дні адчыненых дзвярэй у розных установах, узнагароджанні "сярэбраных" валанцёраў, ветэранаў войнаў, працы і Узброеных сіл.

Так, 30 верасня Нацыянальны мастацкі музей запрасіў пажылых людзей бясплатна наведаць усе свае экспазіцыі. Такой магчымасцю скарысталіся больш за 3 тыс. грамадзян элегантнага ўзросту.