Дадатковае накапляльнае пенсійнае страхаванне з падтрымкай дзяржавы (праграма «тры плюс тры»)

(Указ Прэзідэнта Рэспублікі Беларусь ад 27 верасня 2021 г. № 367 “Аб добраахвотным страхаванні дадатковай накапляльнай пенсіі”).

У чым перавага новага пенсійнага страхавання

Галоўнае адрозненне новай праграмы страхавання ад іншых накапляльных пенсійных праграм страхавых арганізацый – дзяржаўнае суфінансаванне.

Яно заключаецца ў тым, што работнікам, якія прымаюць рашэнне ўдзельнічаць у новай праграме і з 1 кастрычніка 2022 г. выплачваюць са сваёй заработнай платы дадатковы ўзнос на будучую накапляльную пенсію, частка ўзносаў на гэту пенсію будзе аплачана з дзяржаўных сродкаў.

Тарыф накапляльнага ўзносу

• для работніка – ад 1 да 10 працэнтаў (уключна) ад заработнай платы;

Дадатковы ўзнос на накапляльную пенсію па выбраным тарыфе работнік выплачвае разам з абавязковым 1-працэнтным узносам у бюджэт фонду сацыяльнай абароны насельніцтва.

• для работадаўцы – суразмерна ўзносу работніка, але не больш за 3 працэнты

У выпадку ўдзелу работніка ў новай праграме страхавання яго работадаўца абавязаны выплачваць дадатковы ўзнос на накапляльную пенсію гэтага работніка.

Пры гэтым агульны ўзнос работадаўцы на сацыяльнае (пенсійнае) страхаванне не павялічыцца. Для яго будзе супамерна зменшаны тарыф абавязковага 28-працэнтнага страхавога ўзносу на пенсійнае страхаванне ў бюджэт фонду сацабароны.

Перадача часткі ўзносу работадаўцы (да 3 працэнтаў) у пенсійныя накапленні работніку – гэта даходы бюджэту фонду сацабароны, якія выпадаюць. Таму дзяржава прымае на сябе абавязацельствы па захаванні даходаў бюджэту фонду для забеспячэння выплаты бягучых пенсій у рамках салідарнай пенсійнай сістэмы. У гэтым і заключаецца механізм дзяржаўнага суфінансавання новай праграмы добраахвотнага страхавання дадатковай накапляльнай пенсіі па Указе № 367.

Хто можа ўдзельнічаць у праграме

Права ўдзельнічаць у новым страхаванні прадастаўляецца работнікам (грамадзянам, занятым на ўмовах працоўных і (або) грамадзянска-прававых дагавораў, прадметам якіх з'яўляюцца выкананне работ, аказанне паслуг і стварэнне аб'ектаў інтэлектуальнай уласнасці), за якіх іх работадаўцамі выплачваюцца абавязковыя ўзносы ў бюджэт фонду сацабароны.

Уступаць у новую праграму страхавання можна не пазней чым за тры гады да дасягнення агульнаўстаноўленага пенсійнага ўзросту.

Парадак уступлення ў новую праграму і ўдзел у ёй

Добраахвотнае страхаванне дадатковай накапляльнай пенсіі па Указе № 367 будзе ажыццяўляцца рэспубліканскім унітарным страхавым прадпрыемствам “Стравіта” (страхоўшчык).

Работнікі, якія жадаюць фарміраваць дадатковую накапляльную пенсію, пачынаючы з 1 кастрычніка 2022 г. могуць падаць заяву і заключыць дагавор непасрэдна ў страхоўшчыка або ў электронным выглядзе праз афіцыйны сайт страхоўшчыка.

Дадатковыя ўзносы на накапляльную пенсію ў дзяржаўнае прадпрыемства “Стравіта” будуць штомесяц пералічвацца работадаўцам па заяве работніка.

Работнік мае права мяняць тарыф узносу на накапляльную пенсію, але не часцей за 1 раз у год. Таксама можна ў любы момант прыпыніць свой удзел у праграме і потым аднавіць выплату дадатковых узносаў.

Пры дасягненні агульнаўстаноўленага пенсійнага ўзросту страхоўшчыкам работніку штомесяц будзе выплачвацца дадатковая накапляльная пенсія на працягу 5 або 10 гадоў (па выбары грамадзяніна).

Памер будучай накапляльнай пенсіі

Памер накапляльнай пенсіі будзе вылічвацца з сум дадатковых узносаў з улікам даходаў ад іх інвесціравання (па прынцыпе – колькі накапіў, столькі і атрымаў).

Дэталёвую інфармацыю аб магчымых памерах будучай накапляльнай пенсіі, а таксама аб працэдуры ўдзелу ў добраахвотным страхаванні дадатковай накапляльнай пенсіі па Указе № 367 можна атрымаць у страхоўшчыка – дзяржаўнага прадпрыемства “Стравіта”.

Што дае работніку ўдзел у пенсійным страхаванні па Указе № 367

• даступны і зразумелы механізм зробленага загадзя зберажэння сродкаў на старасць з фінансавай падтрымкай дзяржавы. Пры ўступленні работніка ў праграму ўзносы на яго будучую накапляльную пенсію на 30–50 працэнтаў будуць аплачаны з дзяржаўных сродкаў;
• права на льготу па падаходным падатку. Так, работнікам даецца права на атрыманне сацыяльнага падатковага выліку на суму выплачаных за кошт сродкаў работніка страхавых узносаў на будучую накапляльную пенсію. Гэта азначае, што памер заробку работніка, з якога работадаўцам вылічаецца падаходны падатак (13 %), будзе зменшаны на велічыню страхавога ўзносу, выплачанага за кошт сродкаў работніка;

Дадатковыя накапляльныя пенсіі таксама вызваляюцца ад падаходнага падатку з фізічных асоб.

• магчымасць атрымання ў спадчыну пенсійных накапленняў;
• гарантыя захаванасці пенсійных накапленняў. Ажыццяўленне добраахвотнага страхавання дадатковай накапляльнай пенсіі ўскладзена на дзяржаўную страхавую арганізацыю – дзяржаўнае прадпрыемства “Стравіта”. Дзяржава гарантуе страхавыя выплаты па дагаворах страхавання, заключаных гэтым страхавым прадпрыемствам;
• уступленне работніка ў новую праграму ніяк не адаб'ецца на яго дзяржаўнай працоўнай (салідарнай) пенсіі. Яе памер будзе вызначацца па тых самых правілах, што і ў работнікаў, якія не ўдзельнічаюць у добраахвотным страхаванні, – зыходзячы з паказчыкаў стажу і заробку да звароту па пенсію.

Дадатковая інфармацыя аб добраахвотным страхаванні дадатковай накапляльнай пенсіі размешчана на сайце Фонду сацыяльнай абароны насельніцтва Міністэрства працы і сацыяльнай абароны.